Leygarkvøldið vann NSÍ 2-1 á heimavølli ímóti Skála. Hetta var fyrsta ferðin yvirhøvur í ár, at Skála ikki vann fulla úrtøku.
Í kvøld átti NSÍ aftur heimavøll. B71 var gestur við Løkina. Undan dystinum var B71 á fimta plássi við 12 stigum, og NSÍ var á øðrum plássi við 17 stigum.
Tí var einki undarligt í tí, at NSÍ varð roknað at vera favorittur.
Men tað vóru sandoyingar og B71, sum fóru úr Runavík við øllum stigunum. B71 vann 3-1, og nú hevur B71 15 stig ella tvey færri enn NSÍ, sum hevur spælt 10 dystir, meðan B71 hevur spælt 9 dystir.
Hagtølini siga, at NSÍ vann 14 hornaspørk, og at B71 vann fimm hornaspørk.
Miðskeiðis í fyrra hálvleiki legði Jónas Warner gestirnar á odda 1-0 við fínum langskoti.
Sjey minuttir undan steðginum javnaði Aron Knudsen eftir upplegg frá Bergi Johannesen.
Jónas Warner var aftur upp á spæl, tá ið ein stórur tími var farin, og aftur var tað við langskoti, tá ið hann legði B71 á odda 2-1.
Aron Clementsen átti uppleggið, tá ið Joel Varques eitt korter undan leikloki staðfesti 3-1 B71 sigurin.
Leygardagin skal NSÍ spæla á útivølli ímóti EB/Streymi, og B71 skal spæla á útivølli ímóti AB.
