BYGGING
Málið um heim fyri minnisveik í Vallalíð í Havn hevur reikað aftur og fram í fjølmiðlunum seinastu vikurnar.
Søgan er tann, at Tórshavnar býráð hevur samtykt at byggja eitt heim fyri minnisveik í Vallalíð. Tórshavnar kommuna skal rinda helvtina og landið skal ringa hina helvtina. Alt gongur sum tað skal til fólk í grannalagnum gera vart við teirra ónøgd.
Tey vísa á, at byggingin ikki er í tráð við eina samtyk hjá Tórshavnar býráð, har økið, sum heimið fyri minnisveik skal byggjast á, skal nýtast til fríøki.
Talan er um eina útstykkingarætlan hjá Tórshavnar kommunu. Hesar kunnu altíð broytast, men tað krevur, at býráðið samtykir hetta fyrst, og ávísar mannagongdir verða fylgdar ? eitt nú grannahoyringar.
Tórshavnar býráð hevur tikið kæruna hjá grannunum til eftirtektar, men aðrar broytingar, enn at byggilendi verður lækka 1,5 metrar, verða ikki gjørdar.
Meirilutin í býráðnum syrgdi á býráðsfundi síðsta hóskvøld fyri, at uppskot um lækking av byggilendi frá meiriluta í Sosialu nevnd varð samtykt.
Jan Christiansen, borgarstjóri, sigur, at býráðið og kommunan má ásanna, at ein fyrisitingarligur feilur er gjørdur, og hendan má býráðið nú royna at rætta.
Àseta mannagongdir
Tað eru tó ikki tær nógvu fylgjurnar, ið málið fær. Broytingin í byggilendi kostar skattgjaldarunum í Tórshavnar kommunu 800.000 kr. í meirútreiðslu.
Tórshavnar býráð arbeiðir í løtuni við at fáa ásett mannagongdir í sambandi við byggiætlanir. Sambært borgarstjóranum hevur hetta verið leingi ávegis, og kann ikki setast beinleiðis í samband við málið um heimið í Vallalíð, hóast tey hevði verið hent at havt hetta, sigur hann.
?Vit vilja við hesum greiða mannagongdirnar hjá kommununi greiðari, soleiðis at sleppast kann undan villum og misskiljingum, sigur Jan Christiansen.
Aðrar fylgjur fara málið um tey minnisveiku í Vallalíð ikki frá býráðsins síðu í fyrstu atløgu.
Eingin verður uppsagdur fyri ikki at hava kanna nóg væl ella nakað annað í tann stíl. Býarkitekturin, sum var í starvi tá byggingin varð fyrireikað, er farin úr starvi. Borgarstjórin sigur, at tað skal ikki vera fyrrverandi býarkitekturin, sum fær alla skuldina á seg.
?Í síðsta enda er tað borgarstjórin, sum hevur fyrisitingarligu ábyrgdina av, at eingin grannahoyring var í málinum, sigur Jan Christiansen.
Hann leggur afturat, at nýggja kommunu lógin leggur upp til størri opinleika og betri samskifti við borgararnar, har hesir eisini sleppa framat í tílíkum málum.
Grannar kært
Grannarnir, sum lótu býráðnum eina kæru um málið, hava gjørt vart við, at teir ikki halda tað vera nóg mikið við einari lækking áljóðandi 1,5 metrar.
Fyri Útvarpi Føroya hevur umboð fyri grannarnar sagt, at teir fara at kæra málið fyri Landsstýrinum fyrst av øllum.
