Í seinastuni hava umboð fyri India og Japan samráðst um at samstarva um kjarnorkuframleiðslu, men sambært japanska uttanríkisráðharranum, Katsuya Okada, eru hetta tær truplastu samráðingarnar, sum hann hevur verið við í.
Nógvir japanar ivast í, hvussu rætt tað er at samstarva við India á kjarnorkuøkinum, tí India hevur ikki skrivað undir avtaluna, sum áleggur londum at virka ímóti kjarnorkuútbreiðslu.
Men tað eru nógvir pengar í kjarnorku, og tí hevur Japan kortini áhuga í samstarvi við India. Indiska tingið hevur júst samtykt at loyva útlendskum fyritøkum at byggja kjarnorkuverk í India, og ein sendinevnd úr Japan er longu komin hagar at kanna marknaðin.
Metingar siga, at indiski kjarnorkumarknaðurin er verdur meiri enn 500 milliardir dollarar, sigur BBC.
