Sum samgongustevið er vorðið nú seinast í valskeiðinum og soleiðis sum landspolitikararnir føra seg framm í sjálvdrátti, er og verður løgtingsarbeiði bæði tilvildarligt og óvirðiligt til eftir komandi løgtingsval. Eftir eitt annnars væleydnað valskeið eigur løgmaður tí at útskriva løgtingsval.
Løgtingið skal viðgera og taka støðu til viðkvom og týdningarmikil mál næstu mánaðarnar. Talan er m.a. um
málið um vallógarbroytingar,
broytingar í útlendingalóggávuni,
broytingar í fiskivinnulóggávuni,
fíggjarlóg fyri 2008 og í tí høpi m.a. spurningin,
hvar í landinum landsbúskapurin er ovurupphitaður og
hvat skal gerast fyri at tálma ovurupphitingini,
umframt málið um skrásett parlag, sum nú, soleiðis sum mong okkara eisini væntaðu, tykist koma undan kavi í kjalarvørrinum eftir broytingarnar í grein 266b í revsilógini.
Nevndu mál hava uppiborið seriøsa og virðiliga viðgerð og eru tí ikki skikkað at viðgera og enn minni avgreiða á løgtingi, nú valstríðið av álvara er byrjað og tingmenn av øllum alvi umvegis fjølmiðlarnar berjast fyri politiska lívi sínum. Nakrir teirra eru fyri einhvønn prís til reiðar at kollvelta vallógina í einari handavending. Hvørt hesir hava varðhugan av, at valdømini, har teir eru uppstillaðir og valdir, ikki eru nøgd við politisku avrik teirra og at talan tí er um gerrymandering (at tillaga vallógina til egnan fyrimun), soleiðis sum róð hevur verið uppundir í fjølmiðlunum, tykist sannlíkt.
Nógv fingið av skafti.
Breiða samgongan megnaði við táverandi fíggjarmálaráðharra Bárði Nielsen á odda at seta neyð-uga ferð á aftur føroyska búskapin og skapa framburð, eftir at fullveldissamgongan slitnaði. Nú, tað er neyðugt, hevur sitandi fíggjarmálaráðharri Magni Laksafoss lagt upp til veruliga langsiktaða bú-skaparstýring og er farin undir arbeiðið at tálma ovurupphitingini av landsbúskapinum. Eisini valdar friður á ríkisrættarliga økinum, eftir at breiða samgongan fyrst í valskeiðinum samráddi seg til sættis við ríkismyndugleikarnar. Harumframt eru mong onnur týdningarmikil mál avgreidd. Breiða samgongan kann tí við góðari samvitsku leggja frá sær, nú støðan er vorðin, sum hon er.
Loyaliteturin í samgonguni reyk í samband við 266b
Tá lítisverda málið um nú viðtiknu broytingarnar í grein 266b í revsilógini var til viðgerðar og sum ikki einaferð, av fjølmiðlunum bleiv blást upp til nakað, tað als ikki var, megnaði samgongan ikki at standa ímóti og finna felags stev. Sjálvur samgonguleiðarin hoknaði í kongunum, gav eftir fyri fjølmiðlatrýstinum og royndi at gera seg sjálvan til talsmann fyri tað av andstøðuni frammsetta uppskotið. Harvið reyk loyaliteturin í samgonguni og kundi løgtingsformaðurin nú nakrar mánaðar seinni, sjálvt um hann er partur av parlamentariska grundarlagnum undir breiðu samgonguni, uttan um samgonguna og í sjálvdrátti, men eftir øllum at døma eftir avtalu við løgmann og ávísar aðrar tingmenn, loyva sær at leggja framm málið um at skipa Føroyar sum eitt valdømi. Í skrivandi stund er tað seinasta nýggja, at Fólkaflokkurin í sjálvdrátti ætlar at leita sær stuðul hjá andstøðuni í sam-band við yvirtøku av nøkrum málsøkjum.
Avtalan millum samgonguflokkarnar um vallógarbroytingar
Løgmaður vil vera við, at avtala er gjørd millum samgonguflokkarnar um, at vallógarbroytingin, sum fer at gera Føroyar til eitt valdømi, ikki skal fáa gildið, fyrr enn efter komandi løgtingsval, men at miðstaðarøkið afturfyri - og sum plástur á sárið - skal fáa ein tingmann afturat til komandi løg-tingsval.
Onkur løgtingslimur sigur seg ikki kenna til nakra avtalu, meðan aðrir samgongulimir siga seg als ikki vera partar av avtaluni og tí fara at atkvøða fyri uppskotinum hjá løgtingsformanninum, soleiðis sum tað fyriliggur og soleiðis, at Føroyar gerast eitt valdømi beinan vegin.
Hvør sigur satt ella ósatt um avtaluna, ella um ein slík í heila tiki kann sigast at fyriliggja, er ilt at meta um. Undir øllum umstøðum kann í hvussu so er staðfestast, at samgonguavtalan er virðisleys, álitið millum samgongutingmenn burtur og samgongan harvið óarbeiðsfør.
Snøgt sagt, so er samgongan í upploysn. Stundin er tí komin til at lata veljaran tala, reinsa luftina og stinga út í kortið av nýggjum.
