Ólavsøkurøða
- Sitandi samgonga hevur eingi mál, og eg vónaði tískil, at løgmaður fór at skriva út nýval beinanvegin, soleiðis at vit kunnu fáa eina nýggja og neyðuga byrjan í føroyskum politikki.
Tað sigur formaður Tjóðveldisfloksins, Høgni Hoydal.
- Løgmaður og sitandi samgonga hava einki upp á hjarta. Har er eingin loysn í ljósmála upp á tey mál, sum eru frammi, ei heldur upp á tær avbjóðingar, sum liggja fyri framman.
- Høgni Hoydal vísir á, at
løgmaður í røðu síni nam við eitt nú búskap, útlendingamál, fiskivinnulóggávu og kommunusamanlegging, men sambært løgmanni hevur samgongan eingi boð upp á hesi mál.
- Samgongan hevur sum heild eingi boð upp á nakað sum helst – ei heldur upp á teir trupulleikar, sum samgonga sjálv hevur skapt, sigur formaður Tjóðveldisfloksins.
Nýggj mál
Hann sigur, at á tjóðskaparøkinum er einki at heinta, og her er samgongan púrasta uppsteðgað.
- Sjálvandi fegnast vit um yvirytøkuna av kirkjuni, men tá tað er sagt, er so avgjørt neyðugt við eini nýggjari byrjan í føroyskum politikki, sum kann bera okkum longur fram á leið.
Høgni Hoydal sigur, at nú er neyðugt at seta út í kortið av nýggjum, soleiðis at nakað veruligt kann spyrjast burtur úr í føroyskum politikki, samfelagnum at gagni.
Einasta nýggja í røðu løgmans var sambært formanni Tjóðveldisfloksins uppskot hansara um eina fólkaatkvøðu til heystar um at skipa Føroyar sum eitt valdømi.
- Eg ivist stórliga í, um hetta er tað rætta. Vit hava eina valskipan sum tryggjar minnilutum kring um landið eina umboðan.
Høgni Hoydal heldur tað vera undarligt, um hetta sambært løgmanni er tað málið, ið krevur fólkaatkvøðu fram um onnur mál.
