Tað sigur Bárður Nielsen, formaður í fíggjarnevndini og framsøgumaður hjá Sambandsflokkinum, nú løgtingið er farið undir at viðgera fíggjarlógaruppskotið fyri 2014.
Bárður Nielsen harmast um, at landsstýrið hevur slept málinum um at fáa yvirskot á fíggjarlógina í 2016.
– Vit hava lovað okkum til, mótvegis metingarstovninum Moody’s, at vit skulu fáa skil á búskapin aftur. Tí er tað eitt sera óheppið signal at senda, at vit nú sleppa málinum um yvirskot í 2016, sigur Bárður Nielsen.
Framsøgumaðurin hjá Sambandsflokkinum vísir á, at fáa Føroyar verri rating frá Moody’s, samstundis sum lánirentan á altjóða marknaðinum kvinar uppeftur, so kann tað skjótt gerast sera dýrt fyri landskassan.
– Ímynda vit okkum at rentan, sum í løtuni er søguliga lág, hækkar tvey prosent, so merkir tað skjótt 100 milliónir krónur í eyka rentuútreiðslu fyri landskassan, sigur Bárður Nielsen.
Framsøgumaðurin hjá Sambandsflokkinum eftirlýsir eisini nýskipanirnar, sum landsstýrið hevur tosað um, men sum framvegis lata bíða eftir sær.
– Vit mugu bara staðfesta, at einasta nýskipan, sum er framd higartil, er skattanýskipanin. Og her byrjar landsstýrismaðurin so longu at tosa um at fara víðari til næsta stig í nýskipanini. Men samstundis mugu vit eisini staðfesta, at allar hinar nýskipanirnar antin er fullkomiliga uppsteðgaðar ella ongan veg komnar, sigur Bárður Nielsen.
Tann støðan er ein stórur trupulleiki fyri føroyska samfelagið, metir Bárður Nielsen.
– Tí vit mugu bara staðfesta, at frameftir klára vit ikki at reka føroyska samfelagið fyri sama krónutal uttan at fremja nýskipanir. Og nú er valskeiðið also hálvrunnið, sigur Bárður Nielsen.
Sambært fíggjarlógaruppskotinum verður undirskotið næsta ár 250 milliónir krónur. Og sambært langtíðarætlanini verður undirskotið 75 milliónir krónur í 2016.
