Danski uttanríkisráðharrin, Lars Løkke Rasmussen, sigur, at Danmark saman við øðrum sameindum londum umhugsar at seta í verk tiltøk, sum kunnu verja skipaferðsluna í Reyða Havinum.
Millum reiðaríini, sum eru givin at sigla um hesar leiðir, er danska reiðaríið, Mærsk, sum er eitt av heimsins størstu innan bingjuflutning.
- Trygdin í Reyða Havinum við framhaldandi álopum á sivila skipaferðslu er ógvuliga órógvandi og slett ikki haldbar, siga tey á ráðharraskrivstovuni hjá Lars Løkke Rasmussen.
Lagt verður aftrat, at álopini hótta sjófólkið, trygdina á havinum og altjóða handil.
- Saman við sameindum og londum, sum vilja standa saman við okkum, umhugsa vit nú at seta í verk tiltøk, sum kunnu bøta um trygdina hjá okkara sjófólki um hesar leiðir.
Á ráðharraskrivstovuni hjá Lars Løkke Rasmussen siga tey, at Danmark nú umhugsar, hvussu landið best kann luttaka í møguligum tiltøkum í Reyða Havinum.
Tað er tíðindastovan NTB, sum ber hesi tíðindi í kvøld.
