Orðini eigur Johan Dahl, løgtingsmaður fyri Sambandsflokkin.
Hann vísir á, at Framsókn fekk Sambandsflokkin við upp á at lækka ríkisveitingina við eini upphædd, sum Framsókn hevði sett sær fyri. Tað skrivar Johan Dahl á Facebook.
Í valstríðnum hevur Ruth Vang víst á, at eitt gott boð hevði verið at lækkað ríkisveitingina 25 milliónir um árið, men um hetta er talið, sum var á borðinum í samráðingunum, vita vit tó ikki.
Johan Dahl heldur fram:
–Spurningurin ein situr eftir við er, hvørt tað var Javnaðarflokkurin ella Framsókn –ella kanska báðir – sum ikki fóru til samráðingarnar við viljanum til eina BCF samgongu.
– Hetta kundi verið besta samgonga seinastu mongu árini fyri Føroyar, heldur Johan Dahl.
Hann heldur, at tað er í so lætt farið um, at kalla seg ein liberalan flokk, tá man í tveimum samgonguumførum velur reyðar loysnir.
– Kanska hugsa tey seg eyka væl um, áðrenn blekkið verður sett á samgonguskjalið, skrivar Johan Dahl.
