Sum skilst er eisini órógv bæði í baklandinum í Sambandsflokkinum og í tingbólkinum. Stóra projektið hjá Sambandsflokkinum um at økja innøkur landskassans við at fáa meira úr statskassanum er kollsigld – tað er greitt fyri øllum, at hvørki danska stjórnin ella fólkatingið vil hoyra talan um at hækka blokkin meira, enn tann prístalsregulering, sum nú hevði kunnað økt blokkin við níggju milliónum krónum, um ikki samgongan hevði forðað fyri hesum við samgonguskjalinum.
Soleiðis stendur Sambandsflokkurin eftir við ongum. Púrasta ongum.
Fólkaflokkurin hevur vunnið alt. Um tað er tí, at Jørgen Niclasen við sínum 21 ára royndum í politikki dugir so væl – ella um politiski intelligensurin í Sambandsflokkinum er tilsvarandi lakur, skal støða ikki takast til her, men meðan alt ber til hjá Fólkaflokkinum, so ber einki til hjá Sambandsflokkinum.
Hetta er ein trupulleiki fyri samgonguna. Tí er neyðugt hjá Fólkaflokkinum at lora eitt sindur, um samgonguni skal verða lív lagað. Tí kemur rættilig órógv í Sambandsflokkin, so kann samgongan skrædnað. Og ger hon tað – og um Javnaðarflokkurin og Tjóðveldisflokkurin koma til, so hava teir lovað at rulla flatskattin og pensjónsskattingina aftur. Harvið missir Fólkaflokkurin sítt og verður settur á síðuspor.
Vit gita, at Sambandsflokkurin fer at hava ilt við at semjast um Fólkaflokkin um fíggjarlógina. Somuleiðis um fiskivinnupolitikkin, um rullandi veiðiloyvini og so framvegis. Soleiðis kann tað hepnið, sum Fólkaflokkurin hevur við fríspælinum hann hevur frá Sambandsflokkinum koma Fólkaflokkinum aftur um brekkur.
Vil Fólkaflokkurin samgonguni væl, so má hann gera orðini hjá Kaj Leo Johannesen um, at »øll skulu føla, at tey eiga í politikkinum hjá samgonguni« til síni.
Sum nú er, er tað bara politikkurin hjá Fólkaflokkinum, sum sæst aftur. Um Sambandsflokkurin – og kanska eisini Kaj Leo Johannesen – ikki kenna sín ognarlut í politikkinum, so missir borgarliga samgongan sítt kjølfesti.
Lagnurnar speisemi kann soleiðis føra til, at sukse'in hjá Fólkaflokkin soleiðis leggur fót fyri Fólkaflokkinum...
