At landsstýrið nú sendir føroysku lógirnar til ST-mannarættarnevndina, ger bara støðuna verri, sigur Høgni Hoydal. Høgni Hoydal, formaður í Tjóðveldisflokkinum, er als ikki so ovurfegin sum samgongan um føroysku lógirnar, sum nú eru sendar til ST.
- Vit vistu sjálvandi av, at hesi skjølini vóru farin av stað til mannarættarnevndina hjá ST, men vit vistu eisini, at tað var sent í sambandi við regluligu frágreiðingina, sum limalondini senda ST 2. hvørt ár, sigur Høgni Hoydal.
Formaður Tjóðveldisfloksins sigur, at hetta er sama søgan umaftur. Samgongan sigur seg hava gjørt eitt frambrot á sjálvstýrisleið, men tá avtornar vísir tað seg at vera eitt afturstig.
Hetta minnir ikki sørt um, tá løgmaður gamlaárskvøld í 2005 kunngjørdi eitt risa frambrot, við tað at donsku lógirnar um yvirtøku og uttanríkispolitikk vóru send ST. Øll minnast or?ingina »Danmark for såvidt angår Færøerne«, sigur Høgni Hoydal.
Talan var tá um eina »notu«, sum danska stjórnin sendi øllum ST-limalondum, og sum sambært formanni Tjóðveldisfloksins í hesum høpi staðfesti, at Føroyar eru at rokna sum eitt hjáland hjá Danmark.
- Tað, sum nú er sent mannarættindanevndini hjá ST kann tí als ikki sammetast við notuna, tí talan er her um eina frágreiðing sum verður send ST, meðan notan er sent øllum ST-londunum, sigur Høgni Hoydal.
Hann heldur tí, at hetta er enn ein roynd hjá samgonguni at grumsa málið, og alt tað, sum hendan samgongan hevur gjørt á sjálvstýrisleið hevur víst seg í grundini at vera afturstig.
