Sáttmálasamráðingarnar eru vorðnar til tað bera tvætl!
Tað halda níggju fakfeløg á almenna arbeiðsmarknaðinum, sum eisini skulu til samráðingar við Fíggjarmálaráðið í næstum um ein nýggjan sáttmála.
Tey staðfesta, at samráðingarnar millum Almenna fakfelagssamstarvið øðrumegin og Fíggjarmálaráðið og Kommunala Arbeiðsgevarafelagið hinumegin, hava merkt føroyska samfelagið seinastu vikurnar.
Tey staðfesta eisini, at støðan í dag er ein sorgarstøða.
- Tollaksmessuaftan í fjør samtykti Føroya Løgting eina flatskattaskipan, sum partvíst er fíggjað við at skatta inngjaldið til pensjónir.
- Nú hevur Fíggjarmálaráðið eisini avgjørt at tengja skattapolitikkin og sáttmálasamráðingar saman.
Fakfeløgini eru samd um, at hesar avgerðir gera seg inn á samráðingarrættin hjá fakfeløgunum.
- Seinastu árini hava vit fingið at vita við samráðingarborðið, at at hetta fáa tit, og onki annað er at samráðast um.
- Rætturin at samráðast um løn og arbeiðsviðurskifti hjá limum hevur rætt og slætt ikki verið virdur og sæð við okkara eygum, hava landsins mynduleikar gjørt sáttmálasamráðingarnar til tað bera tvætl.
- Vit hava fingið staðfest, at sáttmálasamráðingar í veruleikanum ikki eru samráðingar, men eini harraboð frá arbeiðsgevarunum.
- Okkara áheitan skal vera, at Fíggjarmálaráðið og Kommunala arbeiðsgevarafelagið vísa í verki, at tey virða samráðingarrættin.
Tey feløgini, sum eru samd um hetta, eru: Almanna- og heilsurøktarafelagið,
Bioanalytikarafelagið, Ergoterapeutfelagið, Felagið Føroyskir Sjúkrarøktarfrøðingar, Fysioterapifelag Føroya, Føroya Psykiatrifelag, Heilsuhjálparafelag Føroya, Kost- og føðslufelag Føroya og Ljósmøðrafelag Føroya.
