Belgiskir myndugleikar hava í dag handtikið ein mann, ið er undir illgruna fyri at hava luttikið í yvirgangsálopunum í Paris og Brússel.
Talan er um 31 ára gamla Mohamed Abrini, ið varð eftirlýstur aftaná yvirgangsálopini í Paris í november, ið kravdi 130 mannalív. Hann er eisini undir illgruna at hava verið triði persónurin, ið varð fangaður av einum vakmyndatóli í flogvøllinum í Brússel. Hinir báðir persónarnir sprongdu seg sjálvar í luftina. Tað er belgiska miðilin VRT, ið ber tíðindini.
Harvið hava myndugleikarnir fingið hendur á seinasta persóninum, ið mett hevur verið luttók í álopunum í Paris.
Mohamed Abrini varð eisini filmaður á eini bensinstøð saman við Salah Abdeslam tveir dagar áðrenn yvirgangsálopini í París í november. Abdeslam varð handtikin í Brússel fyri trimum vikum síðani, einans nakrar fáar dagar áðrenn yvirgangsálopini í Brússel.
