Eftir dystin millum ÍF og SÍ fingu vit orðið á ein mest royndu leikarunum á ÍF-liðnum, Randi Larsen. Randi helt, at sigurin var fult uppiborin.
- Vit vóru væl innstillaðar uppá dystin, og vit vistu júst, hvat vit skuldu gera. Hetta riggaði til fulnar í dag. Vit høvdu gjørt av áðrenn dystin, at nýta styrkina hjá okkum í servunum, og hetta vísti seg eisini at rigga væl. Vit spæla tær út í servunum, og teirra álop riggar slett ikki, tí at servurnar hjá okkum sótu so væl.
Randi hevur verið ein av berandi kreftunum á besta kvinnuliðnum hjá ÍF í fleiri ár, men í dystinum ímóti SÍ var hon slett ikki á vøllinum. Hetta passaði henni tó fínt.
- Tað er gott, at yngri leikarar eru klárir at taka yvir eftir meg og aðrar, so tað passaði mær fínt at vera uttanfyri í dystinum í dag.
Spurd, um hetta so eisini fór at gerast hennara seinasti dystur fyri besta kvinnuliðið hjá ÍF, var hon avgjørd á málinum.
- Ja, hetta verður heilt víst mín seinasta dystur. Avgerðin er tikin, og hon stendur ikki til at broyta. Eg ætli mør tó at venja eina ferð ella tvær ferðir um vikuna enn, um eg klári, og so ætli eg kanska at taka mær av onkrum yngri leikarum ella liðum, staðfesti Randi eftir sigurin á SÍ.
