Í allan vetur hava kvinnurnar hjá Neistanum blandað seg upp í oddastríðið, har tær hava kappast við Stjørnuna og Tjaldur. Okkurt skifti hevur Neistin enntá verið fremst í bestu kvinnudeildini í hondbólti, men í løtuni er Neistin seks stig frá oddasessinum og fýra stig frá einum FM-finalusessi.
Neistin hevði møguleikan at styrkja sína støðu sunnudagin, tá tað tó ikki eydnaðist at halda fast og vinna á Stjørnuni í Klaksvík. Nú bert seks umfør eru eftir í Sunset-kappingini, koma ikki nógv fleiri kjansir sum tann, Neistin misbrúkti sunnudagin.
Ein er tó í annaðkvøld klokkan 19, tá StÍF kemur á vitjan í ítróttarhøllini í Havn. Undan hesum dystinum hava hesi bæði liðini spælt ein dyst færri enn hini, og havandi oddastøðuna í Sunset-kappingini í huga, er hetta ein lykladystur hjá Neistanum.
Við einum sigri kann Neistin minka um munin upp til Tjaldur, so hann bara verður tvey stig, og mótstøðan skuldi á pappírinum eisini verið yvirkomilig, tí StÍF er aftast á stigatalvuni við bara einum stigi.
Hinvegin kann eitt tap hava við sær, at Neistin dettur niður ímillum, so FM-finalan mestsum longu tá kann sigast at skula verða ein uppgerð millum Stjørnuna og Tjaldur, sum hava spælt FM-finalurnar síðstu tvey árini.
