So skjótt sum súkklukappingin var liðug í gjár, fór Súsanna Skylv heim at pakka, og hon er nú longu farin av landinum til næstu stóru avbjóðingarnar, ið eru í triathlon. Komandi vikuskiftið skal hon kappast í HM og vikuna eftir skal hon verja DM-heitið, hon vann í fjør.
– Eg eri heilt væl nøgd við at vinna kappingina hjá kvinnunum. Eg havi lagt hetta sum eina harða venjing, sum sostatt er tann síðsta undan HM-kappingini, sigur Súsanna Skylv, sum bara hevði Marin Ennistein at kappast við, tí tær báðar vóru einastu súkklararnir í kvinnukappingini á fulla teininum.
– Tá vit bara eru tvær, kanst tú kenna teg eitt sindur einsamalla viðhvørt, men tað var øgiliga stuttligt allíkavæl. Her vóru eisini so nógvir súkklarar við hesa ferð, at eg var ongantíð heilt einsamøll.
Hon heldur, at kappingin hesa ferð hevur verið nokk so hørð, men tað hevur so samstundis givið henni uppaftur betri venjing, nú aðrar avbjóðingar eru fyri framman.
– Suðuroyggin plagar at vera sera hørð, men har gekst væl, og tað sama var í dag í Streymoynni, hóast eg hevði væntað, at eg fór at vera eitt sindur moyrari, sigur Súsanna, ið einki hevur ímóti at bjóða mannfólkunum av í Statoil Kring Føroyar.
– Eg veit ikki, hvussu teir hava tað við tí, men eg rokni bara við, at mannfólkini eisini onkuntíð hugsa sum so, at tað skal í øllum førum einki konufólk fram um meg.
