Á yvirlitinum, sum Fótbóltslandsliðið hevur sent út í sambandi við landsliðsferðina niður til Spania, stendur Sámal Joensen at umboða Leiftur í Íslandi, men gøtumaðurin, sum býr á Strondum, er framvegis heima á klettunum, og hann venur framvegis við gomlu liðfeløgunum í Gøtu:
? Eg veit ikki rættuliga enn, nær eg fari til Íslands, men tað verður helst eina ferð seint í mars ella kanska fyrst í apríl. Tað veldst eisini um veðrið. Um tað verður nógvur kavi har yviri, so gerst lítið við fótbóltin á Ólafsfirði, siga teir fyri mær, sum hava verið har yviri. Nú fari eg at vera saman við venjaranum, Jens Martini Knudsen, í meiri enn eina viku, og sjálvsagt fara vit eisini at tosa um Leiftur, sigur Sámal Joensen, sum telist millum sjálvsøgdu miðvallarálitini hjá Allani Simonsen.
Ymiskar venjingar
Tað er rættuliga ymiskt, hvussu nógv feløgini í Føroyum hava gjørt við fótbóltin í vetur. GÍ man vera tað felagið, sum hevur verið mest nærlagt myrku tíðina, meðan onnur feløg hava valt at lata spælararnar hava frið og hvíla seg.
Á Toftum hava spælararnir havt møguleikan at spæla innandura onkra ferðina hvørja viku. Í gjárkvøldið skuldu teir fyri fyrstu ferð hittast saman við nýggja venjaranum, Jóannesi Jakobsen, og í dag verður av álvara lagt til brots. Tríggir av spælarunum hjá B68 eru í Spania við landsliðnum. Teir eru Fróði Benjaminsen, Øssur Hansen og so Jan Dam, sum fleiri løgdu til merkis var betri fyri í landsliðsvenjingunum á Svangaskarði tey bæði undanfarnu vikuskiftini, enn hann plagar at vera hesa tíðina á árinum.
? Vit hava vant regluliga síðani eina ferð í november. Vit hava verið nógv í høllini á Kambsdali, og tá veður hevur verið til tað, so hava vit verið á vøllinum í Gøtu. Men tað er ikki fyrrenn nú um mánaðarskiftið, at tað verður farið undir tungu grundvenjingina, sum skal til. At vit hava gjørt ikki so lítið við tað frammanundan átti at gjørt, at sannlíkið var størri at sleppa undan skaðunum, sum nógvir plaga at vera plágaðir av fyrstu vikurnar, tá tunga venjingin er á skránni, sigur Sámal Joensen. Hóast hann heldur seg vera væl fyri, so hevði hann fyri í vetur ætlanir um at verða uppaftur betri fyri so tíðliga á árinum:
? Eg hevði ætlað at runnið nógv einsamallur, men tað hevur ikki ligið fyri. Tað hevur verið nógv at gjørt á skipasmiðjuni á Skála. Vit hava ofta arbeitt langt út á kvøldarnar, og so hevur ikki ligið so væl fyri at runnið.
