65 ára gamli, Hálvdan Gudmundsen í Sandavági, er reiðari á trimum skipum; línuskipunum Eivindi og Havbúgvanum og Vesturtúgvu, sum partrolar saman við Grønanesi.
Longu sum 14 ára gamal í 1967 fór Hálvdan Gudmundsen við Venusi, og í 1968 var hann aftur við Venusi, ið tá var fyrsta skipið, sum royndi við toskagørnum í Grønlandi.
Við Facebook-síðuna hjá Føroysku Sjómansmissiónini sigur hann, at tá vóru heilt aðrar tíðir, tá ráddi um túralongdir, og hvussu leingi teir vóru umborð og høvdu frí.
- Síðst í sekstiárunum og fyrst í sjeytiárunum var Venus sjey jól á rað í Grønlandi ella ávegis heim úr Grønlandi. Dóttirin var fimm ár, áðrenn eg helt fyrstu jólini saman við henni.
Hálvdan Gudmundsen heldur ikki, at slíkt er nakað at reypa sær av, tvørturímóti, men soleiðis var tað bara tá, leggur hann aftrat.
