Søgurnar úr Krabburð hjá Jens Paula Heinesen hava leingi verið fólkaogn, og ein partur av teimum er settur upp sum sjónleikur av bólkinum Grímu.
Mentanarhúsfelagið í Runavíkar kommunu hevur heitt á Grímu at koma framføra leikin fyri eysturoyingum. Súsanna Tórgarð hevur leikstjórnað, og Bárður Persson og Hans Tórgarð hava einar tíggju leiklutir í part, tá teir einsamallir føra fram tríggjar av søgunum í Krabburð í skúlanum á Glyvrum sunnudagin 7. september. Søgurnar um sambandsmannin Tarnovius, sjálvstýrismannin Bartal á Heimabeitið, javnaðarmannin Kaj Erik hjá Marini og øll hini vóru skrivaðar í trýssunum, men politiski hugsunarhátturin í Føroyum er lítið og einki broyttur. Og ikki er tað stórur munur á føroyskum »orginalum« tá og nú. Gamli Balteus, kongsbóndin Peter Ludvig Højhauge, Ábraham, Albana og Hanna Malena fara á valfund, keypa skip, og taka ímóti Kongi í Krabburð, og tað er ikki bara gamansleikur, ið spyrst burturúr. Sýningin er ætlað bæði gomlum og ungum, børnum og vaksnum. Hóast innihaldið kanska mest er fyri vaksin, so eru fólkið í Krabburð so løgið og stuttligt, at børnini kanska fáa mest burturúr.
Søgurnar úr Krabburð verða sýndar í skúlanum á Glyvrum sunnudagin 7. september kl. 17.00. Atgongumerki fáast á Kunningarstovuni í Saltangará og við dyrnar.
