Leygardagin fekk løgreglan fráboðan um eitt ferðsluóhapp við Hvítanesvegin, har ein bilførari hevði koyrt út fyri eitt prutl. Førarin á prutlinum megnaði ikki at steðga, men misti í staðin tamarhaldið á prutlinum, bar við bilin og datt á vegin.
Førarin á prutlinum fekk ongan skaða í óhappinum, men prutlið fór í knús.
Vakthavandi á løgreglustøðini veit ikki, um bilførarin var varugur við óhappið, men upplýsir, at viðkomandi steðgaði ikki á, men koyrdi víðari. Tí heitur løgreglan á fólk, ið vita nakað um málið ella hava sæð tað, at ringja á løgreglustøðina.
Tilburðurin hendi á Hvítanesvegnum um 14.40 tíðina. Bilurin, ið rýmdi frá óhappinum, var ein myrkagráur Golf VW, og er mettur at vera umleið 10 ára gamal.
