Enn einaferð hevur Russland lopið á undirstøðukervið í ukrainska høvuðsstaðnum, Kyiv. Hetta hendi tíðliga í morgun, upplýsir býarumsitingin í Kyiv á Telegram.
Leiðarin fyri hernaðarumsitingina, Sergii Popko, skrivar á Telegram, at ukrainar hava skotið 15 dronur niður í loftrúminum yvir Kyiv.
Aðrar dronur hava rakt, og tað er undirstøðukervið í býnum, sum enn einaferð hevur kent sviðan. Í minsta lagi tvey fólk hava fingið skaða í álopunum á Kyiv í morgun.
Journalistar hjá netávísini Ukrainska Pravda siga, at harðar spreingingar hava verið at hoyrt í miðbýnum, og hildið verður, at talan serliga hevur verið um ukrainskar loftverjurakettir.
Sagt við úr Kyiv, at sløkkiið stríðast við at sløkkja eldar eftir russisku dronuálopini, og heitt hevur verið á íbúgvar í býnum um at søkja sær skjól.
Ukrainskir myndugleikar siga, at Russland hevur skotið tilsamans 20 iranskt framleiddar Shahed 136-dronur eftir Kyiv í morgun.
Hesar dronur verða ofta róptar kamikaze-dronur, tí tær flúgva beint inn í sjálvt málið í staðin fyri at skjóta rakettir og venda aftur. Dronurnar hava eisini verið róptar sjálvmorðsdronur.
Sagt verður, at harðir bardagar eisini hava verið í býnum, Bakhmut í Donetsk-fylkinum, um vikuskiftið, og her verður lagt aftrat, at ukrainskar deildir hava megnað at rikið russar burtur frá støðum í eystara parti av býnum.
Í einari video-røðu sunnukvøldið, segði ukrainski forsetin, Volodymyr Zelenskyj, at støðan í Bakhmut er álvarslig, men hann legði dent á, at ukrainskar deildir hava eftirlit við býnum.
Hørðu bardagarnir í Bakhmut hava vart í fleiri mánaðir, og mett verður, at bæði Russland og Ukraina hava mist fleiri hundrað hermenn í bardøgunum um býin.
