Eitt flogfar í Russlandi neyðlendi í dag á einum kornakri uttan fyri Moskva, eftir at tað hevði flogið inn í ein másaflokk stutt eftir fráferð.
Tað upplýsa embætismenn.
##med2##
Eingin er deyður, og eingin fekk álvarsligan skaða. 23 fólk vórðu flutt á sjúkrahús við smærri snuddum, upplýsir russiska heilsumálaráðið. Teirra millum vóru níggju born.
Ural Airlines A 321 hevði 233 fólk umborð – 226 ferðafólk og manning, sum taldi sjey.
Flogið var á veg úr altjóða Zjukovskij-flogvøllinum í Moskva ímóti Simferopol-flogvøllinum á Krim hálvoynni.
##med3##
Flogfarið fleyg inn í másaflokkin beint eftir at tað var farið á flog. Tað skapti trupulleikar við motorunum.
Motorarnir slóknaðu, og lendingarhjólini vóru ikki úti, tá flogfarið neyðlendi. Tað upplýsir ein talsmaður fyri russisku flogferðslumyndugleikarnar.
##med4##
Russiska blaðið Komsomolskaya Pravda hevur longu kallað flogskiparan eina »hetju«, eftir at hann »meistarliga lendi flogfarið á einum kornakuri uttan lendingarhjól og uttan motorar«.
Hendingin verður samanborin við merkisverdu neyðlendingina á Hudson-ánni í New York í 2009.
Tá var tað ein samanstoytur við ein gásaflokk, sum gav flogfarinum trupulleikar við motorunum.
##med5##
Eitt ónevnt ferðafólk sigur við russiska ríkissjónvarpið, at flogfarið fór at rista ógvusliga stutt eftir fráferð.
– Fimm sekund seinni fór ljósið í høgru síðu í flogfarinum at blunka, og brendaroykur merktist. So lendu vit, og øll runnu, sigur ferðafólkið sambært tíðindastovuni Reuters.
/ritzau/Reuters
##med6##
##med7##
##med8##
