Russiski rakettkrússarin Moskva, sum verður sagdur at vera flaggskipið hjá russum í Svartahavinum, hevur fingið stóran skaða. Spreingingar vóru umborð, og eldur kom í skipið.
Seint í gjárkvøldið váttaðu russiskir myndugleikar, at eldur var í skipinum eftir spreingingar, og at skipið hevði fingið stóran skaða. Øll manningin var farin av skipinum.
Ukrainar siga, at tað vóru teir, sum sendu rakettir eftir russiska super-skipinum, sum skipið eisini hevur verið rópt. Ráðgevin hjá ukrainska forsetanum, Volodymyr Zelenskyj, sum kallast Oleksij Arestovytsj, skrivaði á Tvitter í gjár, at ukrainski herurin hevði framt álop á skipið.
- Hvar er Moskva? Hon er sokkin, skrivar ráðgevin á Tvitter.
Risastóri rakettkrússarin er bygdur í 1980-unum og hevur verið sæddur sum flaggskipið hjá russiska herinum í svartahavsflotanum. Tíðindastovan RIA váttar í gjár við russiska verjumálaráðnum sum keldu, at spreingingar hava verið umborð á skipinum.
##med2##
- Moskva hevur fingið stóran skaða, og øll manningin er farin av skipinum. Orsøkin til eldin verður nú kannað, skrivar RIA, sum hevur keldur í russiska verjumálaráðnum.
Leiðarin fyri fylkisumsitingina í havnabýnum Odessa við Svartahavið, Maksim Martsjenko, skrivar á Telegram mikukvøldið, at rakettkrússarin er raktur av Neptun-rakettum.
Fleiri utlendskir miðlar skriva í nátt og í morgun, at umborð á einum slíkum skipi eru í minsta lagi 500 hermenn. Í Russlandi hava tey enn ikki váttað, at super-skipið er rakt av ukrainskum rakettum.
##med3##
