Týsdagin gjørdist Føroyar eitt aðalráð ríkari, tá nýggja samgongan stovnaði ella endurstovnaði Innlendismálaráðið, tá Henrik Old gjørdist landsstýrismaður.
Tað eru nógv praktisk viðurskiftir, ið skulu fáast upp á pláss, tá eitt nýtt ráð verður sett á stovn. Harímillum má nýggja ráðið hava ein aðalstjóra.
Í gjár gjørdist greitt hvør nýggi aðalstjórin verður, tá Aksel V. Johannesen, løgmaður, setti Rúna Joensen í starvið.
Rúni Joensen er ikki heilt ókendur í nýggja starvinum. Hann var nevniliga aðalstjóri í Innlendismálaráðnum tá ráðið varð niðurlagt í 2013. Tað hendi aftaná at Kári P. Højgaard varð loysur úr starvi sum landsstýrismaður sum fylgi av rokanum um CIP-sáttmálan.
Rúni Joensen er 56 ára gamal, er útbúgvin løgfrøðingur og hevur seinastu árini starvast sum ráðgevi í Vinnumálaráðnum.
