Ársins mál í Premier League?

Henrikh Mkhitaryan skoraði í gjár eitt óvanliga gott mál fyri Manchester United, sum vann 3-1 á Sunderland. Armenski landsliðsspælarin hælaði bóltin í málið til 2-0.

Síggj málið við at trýsta á pílin á myndini

Nú verður tosað um, at talan er um ársins mál í Premier League. Tað er tó ein ivastøða við málinum, tí sjónbandamyndirnar vísa eisini, at Henrikh Mkhitaryan stendur rangstaddur.

Hóast tað, so er talan um framúr vakurt mál. Nú spyrja vit – er talan um árins mál?

Premier League á jólum

Chelsea, Manchester City, Arsenal og Manchester United vunnu øll sínar dystir í gjár. Chelsea hevur nú vunnið tólv dystir upp í slag í Premier League. Londonfelagið, sum var uttan leikbannaða Diego Costa, vann 3-0 á Bournemouth.

Manchester City hevði trupulleikar við at niðurbróta Hull City, men við trimum málum seint í dystinum vunnu teir 3-0. Millum málskjúttarnar var 20 ára gamli Kelechi Iheanacho. Hann skorar í løtuni eitt mál fyri hvørjar 96 minuttir á vøllinum. Tað er Premier League met.

Arsenal hevur havt tað trupult í seinastuni. Soleiðis var eisini á heimavølli móti West Bromwich. Ikki fyrr enn tríggjar minuttir fyri tíð skoraði Oliver Giroud sigursmálið, sum eisini var tað einasta í dystinum.

Manchester United hevur funnið taktina og vann fyri fjórðu ferð upp í slag. Fótbólturin er góður og Zlatan Ibrahimovic tykist stórtrívast í Premier League, hóast hann er blivin 35 ára gamal. Bretskir miðlar skriva, at hann leingir eitt ára sáttmálan við einum ári. Zlatan Ibrahimovic hevur skotið heili 12 mál í Premier League higartil.

Ein dystur er í dag. Liverpool tekur á heimavølli móti Stoke. Dysturin byrjar klokkan 17.15.

Premier League 18. umfar:

Í gjár:

Watford 1 - 1 Crystal Palace

Arsenal 1 - 0 West Bromwich Albion

Burnley 1 - 0 Middlesbrough

Chelsea 3 - 0 AFC Bournemouth

Leicester City 0 - 2 Everton

Manchester United 3 - 1 Sunderland

Swansea City 1 - 4 West Ham United

Hull City 0 - 3 Manchester City

Í dag:
Liverpool – Stoke (17.15)

Í morgin:

Southampton – Tottenham (19.45)

Stigatalvan: (Livescore)