Í gjárkvøldið var Víkingur á Tórsvølli og vandi á nýggja undirlagnum. Í kvøld er løtt venjing á skránni, og í morgin verður mannagongdin soleiðis, sum hon altíð er tað, tá ið liðið spælir á útivølli.
Jógvan Martin Olsen er venjari hjá Víkingi. Hann veit, hvat tað snýr seg um, tá ið steypafinala er á dagsskránni, tí hann hevur tríggjar ferðir áður verið ábyrgdarmaður í finalum. Í 2002 vunnu hann og NSÍ, í 2004 taptu hann og NSÍ, og í 2009 vunnu Víkingur og Jógvan Martin Olsen 3-2 á EB/Streymi í fyrstsu finaluni um løgmanssteypið, sum EB/Streymur síðani hevur vunnið tvær ferðir.
-Alt talar fyri einari púra opnari finalu. Vit hava vunnið tvær ferðir á teimum í landskappingini fyrr í ár – 2-1 á heimavølli og 1-0 á útivølli – men í báðum førum hevur talan verið um heilt tættar uppgerðir, har teir væl kundu havt javnað, heldur Jógvan Martin Olsen, sum vísir á, at finaluroyndirnar eru mótstøðumonnunum til fyrimunar:
- Síðani vit vóru í finaluni fyri trimum árum síðani er helmingurin av liðnum skiftur út. EB/Streymur hevur verið í finaluni fimm tær seinastu ferðirnar, og flestu lyklaspælararnir hava verið við allar ferðirnar, so teir vita orduliga, hvat tað snýr seg um.
Støðugir víkingar
Víkingur er á triðja plássi í landskappingini. Tað eru fýra stig fram til EB/Streym, sum er oddalið. Merkisvert er tað, at bæði liðini tríggjar ferðir eru farin av vøllinum uttan úrtøku. EB/Streymur hevur tapt tvær ferðir ímóti Víkingi og eina ferð ímóti NSÍ. Víkingur hevur tapt 1-0 á heimavølli í Fuglafirði ímóti KÍ, og 3-0 í Gundadali ímóti B36 og 4-1 á heimavølli ímóti ÍF.
-Einasta ferðin, at vit heilt eru dotnir burturímillum, var í heimadystinum ímóti fuglfirðingum. Annars hava avrikini verið rættuliga støðug. Tað er bara í málleysa javnleikinum í Gundadali ímóti HB, at vit ikki hava skorað mál. At vit fleiri ferðir enn kappingarneytarnir í toppinum hava verið partur av javnleikum hevur kostað stig, men alt í alt hava avrikini verið støðug, heldur Víkinga venjarin.
Allir víkingarnir eru tøkir undan steypafinaluni. Einasta minussið er, at miðvallarin Sølvi Vatnhamar hevur burturstaddur. Hann er farin av landinum í lestrarørindum, men hann kom aftur til Føroya í gjárkvøldið og verður við í morgin.
Setningurin
Spurningurin er so, hvussu víkingarnir leygarkvøldið ætla sær at fella mótstøðuliðið:
-Í hesi vikuni hugsa vit bara um steypafinaluna og als ikki um, at tað longu mikukvøldið aftur er landskappingardystur á skránni. Vit hava sjálvsálit og hvíla í okkara spæli og tað, sum vit halda vera okkara styrkir, men sjálvandi hugsa vit eisini um mótstøðuliðið, og tað hevur aftur í ár verið sjón fyri søgn, at EB/Streymur eigur einstaklingarnar, sum eru førir fyri at avgera eina finalu.
Sunnudagin var Jógvan Martin Olsen í Streymnesi, har hann sá EB/Streym eftir tógvið stríð vinna 3-2 á TB:
-Umrøðurnar eru ymiskar. Tá ið vit vunnu 1-0 á TB á heimavølli varð sagt, at okkara avrik var ikki sannførandi. Tá ið EB/Streymur vann 3-2 á TB, so varð tað sagt, at TB eigur eitt framúr gott lið. Men ikki minst 2. hálvleikur ímóti TB vísti, hvussu stóran týdning tað hevur fyri EB/Streym, at Arnbjørn Hansen og Hans Pauli Samuelsen eru í álopinum saman við Leif Niclasen. Eg ivist ikki í, at Arnbjørn verður við frá fyrsta bríksli ímóti okkum.
Jógvan Martin Olsen heldur, at EB/Streymur fer so at siga at toppa liðið leygarkvøldið, og tá verða hesir á vøllinum: René Tórgarð – Gert Hansen, Sorin Anghel, Marni Djurhuus, Jónhard Frederiksberg – Pætur Dam Jacobsen, Pauli G. Hansen, Levi Hanssen – Leif Niclasen, Arnbjørn Hansen, Hans Pauli Samuelsen.
