Aftur í ár skipa Føroya Ellisakfør fyri go-cartkoyring á Óðinshædd um ólavsøkuna. Hetta er á triðja sinni, at felagið hevur hetta tiltakið á ólavsøku - og vænta teir aftur í ár góða undirtøku. Føroya Ellisakfør eiga fýra slíkar bilar - og teir slítast sum vera man, tá teir hava koyrt í dagavís. Tí hevur Føroya Ellisakfør hesaferð gjørt avtalu við nakrar bilhandlarar, sum á verkstøðum sínum hava umvælt bilarnar, sum tí eru sum nýggir til koyringa hesaferð. Afturfyri fáa bilhandlararnir lýsingar á bilarnar.
Petur Johannessen, ein av limunum í Føroya Ellisakførum, sigur við Sosialin, at tey vitjandi sjálvsagt kunnu vænta sær spenning, um tey royna bilarnar á ólavsøku. Fyribilsbreytin á óðinshædd verður nevniliga væl egnað til go cart koyring. Hon hevur nógv sving, har tú kanst royna tíni kynstur í at koyra skjótt ígjøgnum. Men hóast spenningin og avbjóðingarnar, vissa limirnir í Føroya Ellisakførum um, at trygdin er í hásæti.
Go cart bilarnir eru bygdir til slíka stuttleikakoyring, og tey, ið koyra, sita bæði í hjálmi og trygdarbelti. Harafturat liggja gomul bildekk við síðuna av allari breytini, fyri at minka um stoytin, um onkur av førarunum skuldi mist tamarhaldið á bili sínum.
Aldursmarkið fyri at sleppa at koyra go cart um ólavsøkuna er 16 ár.
Eiga bilarnar
Tá Føroya Ellisakfør á fyrsta sinni tók stig til at skipa fyri go cart koyring á ólavsøku, varð avgerð tikin um at keypa teir átta bilarnar, nýtast skuldu. Ætlanin var nevniliga at skipa fyri slíkari koyring við jøvnum millumbilum - í hvussu so er á hvørjari ólavsøku, og tí helt felagið, at tað eins væl kundi ognað sær bilarnar sum at leiga teir. Fyrstu ferð go cart koyringin varð roynd á óðinshædd á ólavsøku fyrraárið, var undirtøkan ógvuliga stór, og tað vænta fyrireikararnir eisini, at hon fer at verða í ár. Men teir hava størri ætlanir, enn bert at nøkta koyrirúsin hjá fólki á ólavsøku. Arbeitt verður nevniliga við at fáa eina koyribreyt nærhendis vatnbrunnunum, felagið hevur fingið við gráastein. Felagið hevur nevniliga ætlanir um, at fáa gjørt eina kombineraða hálku - og go cart breyt, um myndugleikarnir loyva hesum.
Eingin framsýning
Føroya Ellisakfør hevur havt framsýning av gomlum bilum, myndum og øðrum á hvørjari ólavsøku, síðani felagið varð stovnað í 1992. Men eins og í fjør, hava limirnir í ár hava limirnir tikið støðu til, at eingin framsýning verður. Ætlanin hevur verið at hava framsýningina á øðrum hvørjum ári í staðin fyri á hvørjum ári, sum siðvenja hevur verið. Hildið verður nevniliga, at framsýningin verður meira áhugaverd fyri tey vitjandi, um hon ikki er á skránni á hvørjum ári. Harafturat krevur ein slík framsýning nógv arbeiði. Bilarnir skulu jú gerast klárir, og hetta er ikki altíð bara sum at siga tað.
Men sjálvt um eingin framsýning verður í ár, ber til at leita sær niðan á óðinshædd og fáa adrenalinið í kók við einum góðum go cart túri. Næsta ár verður aftur høvi at síggja gomul, men vøkur ellisakfør á framsýningini hjá Føroya Ellisakførum.
Í annaðkvøld, 27. juni, verður ber til at koyra go-cart frá klokkan 18 til 22. Ólavsøkudagarnar og sunnudagin verður opið frá kl 15 - 22.
