Rói Berg Hansen skoraði fýra mál fyri lið sítt, HØJ sum á heimavølli vann greiðan 35-27 sigur á FIF. HØJ hevði tó sítt hoyggj við FIF í fyrra hálvleiki. Í steðginum var støðan javnleikur 16-16, men í seinna hálvleiki var HØJ greitt betra liðið.
Sigurin merkir, at HØJ nú er næstovast í næstbestu donsku hondbóltsdeildini, eitt stig frammanfyri Sydhavsøerne og tvey stig frammanfyri Grindsted.
Komandi leygardag klokkan 14 verður føroyingauppgerð í Tønder millum Tønder og HØJ.
Brandur Halgirsson skoraði trý mál tá hann og liðfelagarnir í Ajax vunnu ein sera týðandi 32-25 heimasigur á HEI Skæring. Í steðginum var Ajax á odda 18-14.
Sigurin lyfti Ajax uppá 6. plássið har teir hava 19 stig. Seks stig eru niður til beinleiðis niðurflytingarplássið.
Komandi fríggjakvøld klokkan 18.30 spælir Ajax heimadyst móti Otterup, ið hevur trý stig færri enn Ajax.
Støðan:
| Nr. | Lið: | Dystir | Stig |
| 1 | HC Midtjylland | 18 | 33 |
| 2 | HØJ | 18 | 28 |
| 3 | Team Sydhavsøerne | 19 | 27 |
| 4 | Grindsted GIF | 19 | 26 |
| 5 | IK Skovbakken | 19 | 21 |
| 6 | Ajax | 19 | 19 |
| 7 | Odder | 18 | 16 |
| 8 | HEI Skæring | 18 | 16 |
| 9 | Otterup HK | 19 | 16 |
| 10 | TM Tønder | 19 | 14 |
| 11 | FIF | 19 | 13 |
| 12 | Roskilde | 19 | 13 |
| 13 | Vendsyssel | 18 | 11 |
| 14 | HC Odense | 18 | 7 |
