Rógvi og Fram vunnu seg í endaspælið

Tað var sera spennandi kapping millum Afturelding, Fram og Gróttu um hvørt av teimum trimum fór at tryggja sær áttanda plássið í grundspælinum í bestu íslendsku hondbóltsdeildini, og harvið fylgja Vali, Haukum, ÍBV, FH, Selfossi, Stjørnuni og KA í endaspælið um íslendska meistaraheitið.

Rógvi Dal-Christiansen skoraði eitt mál og tók sum vant nógv tøk í verjuni tá lið hansara vann ein væla 26-23 sigur á Afturelding á útivølli. Undan dystinum hevði Afturelding 19 stig og málúrtøkuna minus níggju mál. Fram hevði 17 stig og málúrtøkuna minus 11 mál. Fram var á odda 15-12 í steðginum. 

Sigurin hjá Fram merkir, at bæði Afturelding og Fram endaðu á 19 stigum, men Fram hevur minus átta mál og Afturelding hevur minus 12 mál. Grótta sum eisini endaði á 19 stigum hevur eisini minus 12 mál.

Grótta vann 33-28 á KA. Allan Norðberg skoraði eitt mál fyri KA. Nicholas Satchwell í KA-málinum bjargaði 29 prosent av royndunum hjá Gróttu. Í steðginum var Grótta á odda 18-14.

Øll trý føroyingaliðini, Fram, KA og ÍBV, ið hevur Dánjal Ragnarsson í hópinum hava vunnið seg í endaspælið og skulu spæla fjórðingsfinalur aftaná páskir. 

Dysturin millum KA og ÍBV, ið ikki hevur stóran týdning er einasti dystur sum manglar at vera spældur í grundspælinum. 

Endaliga støðan í grundspælinum (Ein dystur millum HK Og ÍBV manglar):