Í Hósvíkar Róðrarfelag, sum skipar fyri regatta í Sundalagnum, siga tey, at róðrarbátar, sum luttaka á tiltakinum, byrja at rógva av Eiði fríggjadagin hin 13. august klokkan 14.15.
- Hetta er ein sera hugnaligur túrur, har “vit í fylgi rógva summarið av okkum”, sum tey taka til.
Víst verður á, at tiltakið er sera væl umtókt millum róðrarfólk, og siður er at fara ein túr upp á Grønhólm norðanvert Streymnes til eitt ella tvey kvæði, áðrenn hildið verður fram suður til Hósvíkar.
Aftur í ár verður tað kokkurin, Ruben Busk, sum fer at standa fyri døgurðanum í bygdarhúsinum í Hósvík, og í Hósvíkar Róðrarfelag leggja tey dent á, at kokkurin er royndur í leikum.
- Kokkurin fer at borðreiða við rosastoktum oksafilet, mildari piparsós og øllum góðum afturvið.
##med2##
Regattatiltakið verður sett á Eiði fríggjadagin 13. august klokkan 14 av borgarstjóranum í Sunda kommunu, Jógvani Kruse. Kappróðrarbátar byrja at rógva av Eiði klokkan 14.15, og motorbátar loysa klokkan 14.45.
Døgurðin í bygdarhúsinum verður frá klokkan 18, og um kvøldið verður ymiskur live-tónleikur við kendum nøvnum í sonevnda Tónaneystinum í Hósvík.
Klokkan 23 verður felagssangur á kaiøkinum, og klokkan 23.30 fer Henrik Old, løgtingsmaður, at halda røðu. Á midnátt verður dansur í bygdarhúsinum í Hósvík, har Spaðar 5 fara at spæla.
Leygarmorgunin frá klokkan 9 til 12 verður morgunmatur í bygdarhúsinum fyri regattagestum. Vanligt er, at tá morgunmaturin í Hósvík er etin, at fleiri bátar og bátsmanningar leggja leiðina út til Nólsoyar á ovastevnu.
