Tey, sum plaga at fylgja við sonevndu reality-sendingunum á útlendskum sjónvarpsrásum, royna ofta at hava fingurin á pulsinum, tá gitt verður um, hvør næsti persónurin verður, ið skal stemmast heim.
Í Klaksvík tykjast tey tó hava sína egnu útgávu av t.d. Robinson-ekspeditiónini. Fyrst var tað Ove Flindt Bjerg, venjari, sum varð sendur heim. Stutt eftir boðaði táverandi formaðurin, Gestur Hovgaard, frá, at hann nú eisini tók seg úr nevndini. Og nú er triði persónurin innan stutta tíð farin úr KÍ-toppinum.
Hesa ferð er tað Símun Gullaksen, ið annars hevur virkað sum formaður í fótbóltsdeildini hjá KÍ.
- Tað er rætt, at Símun er farin frá. Hetta hevur hann sjálvur biðið um, nú hann í løtuni ikki sær seg føran fyri røkja tær skyldur, sum hann hevur í nevndararbeiðinum, sigur John William Joensen, sum er kunningarleiðari hjá KÍ.
Hesum hevur nvndin nú eftirlíka, og ístaðin er Allan Joensen nú settur sum leiðari av fótbóltsdeildini.
Allan er annars einamest kendur frá sínum leikluti á vøllinum, har hann í drúgt áramál varð roknaður sum kanska størsta talentið í føroyskum fótbólti. Nakrar A-landsdystir gjørdist talan eisini um, men skaðar í ólukkumát forðaðu fyri eini støðugari tilveru í hesum.
Fleiri ferðir hevur Allan eisini roynt at vunnið sær pláss aftur á besta KÍ-liðnum, og seint sum fyri 10 døgum var hann við, tá KÍ spældi móti EB/Streymi, men sum ikki einaferð, so varð hann eisini skaddur ta ferðina.
