Hægstirættur í Kili hevur gjørt av at ógilda tað politiska órinið hjá fyrrverandi forsetanum Augusto Pinochet, soleiðis at hann kann koma fyri rættin, tí hann er ákærdur fyri skattasvik.
Ákæruvaldið vil vera við, at Pinochet stakk 27 milliónir dollarar í egnan lumma í árunum frá 1981 til 2004, og at hann slapp sær undan at gjalda 16 milliónir krónur í skatti. Ákæruvaldið vil eisini vera við, at ein partur av inntøkuni stavaði frá ólógligum vápnahandli og øðrum ólógligum virksemi.
Hetta er ikki tað fyrsta rættarmálið ímóti fyrrverandi forsetanum, men tað er strævið hjá ákæruvaldinum at koma nakran veg, tí í hvørjum einstøkum føri má tað biðja hægstarætt ógilda politiska órin hansara. Í september ógildaði hægstirættur órinið, so Pinochet kann ákærast fyri at hava givið boð um at beina fyri 15 politiskum mótstøðumonnum undir hernaðarstýrinum, sum stýrdi Kili frá 1973 til 1990.
