Finn Esben Hansen, skipari, er dani. Hann hevur siglt í skandinaviskum sjógvi í 50 ár, og hann sigur seg ikki hava upplivað so vánaligt veður á sjónum nakað summar sum í ár.
- Hetta minnir mest um vánaligt vetrarveður, sigur hann við Bergens Tidende.
Atlantic Traveller hevði ein ringan túr úr Hanstholm til Noregs í síðstu viku, og tá skipið skuldi leggja at bryggju í Bergen seinasta fríggjadag, steðgaði motorurin. Hetta var annað óhappið í summar. Tað fyrra var í juni, tá eitt vindblak sendi skipið inn í ein mola í innsiglingini í Hanstholm. Tá lá skipið eina viku til umvælingar.
Reiðaríið gevur skiparanum rætt í tí, sum hann sigur um veðrið í summar.
- Hetta svarar til, at tað var mjørki á flogvøllinum í Bergen allan juli mánað, sigur Harald Thorstensen, reiðari.
