Ongantíð áður hevur gongdin við heimsins djórum og plantum verið so neilig sum nú, tí umleið ein millión djóra- og plantusløg eru hótt av at doyggja út. Nógv teirra eru í vanda fyri at vera burtur longu innan fá áratíggju.
Tað staðfestir ST-organisatiónin Ipbeb, sum er til fyri at skjalfesta gonginda við alheims lívmargfeldinum, í nýggjari frágreiðing á 1.800 síður.
Frágreiðingin ger greitt, at 75 prosent av øllum vistskipanum á landi eru niðurbrotin av menniskjaligum aktiviteti. Høvuðsorsøkirnar eru landbúnaður, lendisnýtsla og veðurlagsbroytingar.
Ein niðurstøða í frágreiðingini er, at neiliga gongdin kann vendast, um heimurin ger ítøkilig stig til frama fyri hesum beinanvegin.
- Nær er ovmikið?
Alarmklokkurnar ringja, og tað hava tær gjørt leingi, og føroyski umhvørvisfelagsskapurin Ringrás rópar í hesum sambandi varskó:
- Vit hoyra frá føroyskum landsstýrisfólkum so sum Poul Michelsen, hvussu stórur møguleiki tað er fyri Føroyar, nú havísurin norðanfyri okkum er um at fara í søguna. Fólk eru, av góðari grund, á gosi, tí amerikanski uttanríkismálaráðharrin herfyri kom við sama stuttskygda, kyniska og fávituga boðskapi í Arktiska ráðnum, har hann tosaði um nýggjar olju- og siglingarleiðir. Poul Michelsen var helst rørandi samdur.
Ringrás sigur víðari og setir nakrar spurningar:
- Mynstrið er tað sama sum vant, vit váða heimin fyri møguligan løtuvinning til tey á ovastu rók. Veit nakar í føroyskum politikki, hvussu stóran týdning ísurin í Arktis hevur fyri tað liviliga veðurlagið, sum vit og okkara fiskiskapur eru óloysiliga tengd at? Nær er ovmikið? Tá vit hava týnt lívsgrundarlagið undan okkum sjálvum?
