Hetta hevur verið eitt "Jekyll og Hyde" kappingarár hjá liðnum hjá Eliasi Ellefsen á Skipagøtu, THW Kiel.
Í Champions League eydnaðist tað at vinna innleiðandi bólk A, og harvið beinleiðis atgongd til fjórðingsfinalurnar.
Í bundesliguni hevur søgan tó verið ein onnur.
Síðani 2019 hevur kekkiski, Filip Jicha verið høvuðsvenjari hjá Kiel, og tey undanfarnu kappingarárini í bundesliguni hevur Kiel ongantíð mist meir enn átta stig. Hetta skrivar danska heimasíðan, Europamester.
Í hesum kappingarárinum hevur Kiel longu mist 14 stig, og liðið úr Norðurtýsklandi er nummar fimm í bundesliguni við 34 stigum, 11 stig aftanfyri liðið hjá Hákuni West av Teigum, Füchse Berlin sum hevur 45 stig, og er oddalið í bundesliguni.
Kiel hevur tó leikt tveir dystir færri, og teir kunnu tí stytta munin niður í sjey stig, men tað sær einki út hjá Kiel at røkka Champions League gjøgnum eina endastøðu í bundesliguni. Kiel má enda á einum fyrsta ella øðrum plássi um tað skal eydnast.
Besta vónin hjá Kiel er at fara eftir sigrinum í Champions League.
Stendur Kiel við ongum aftaná lokið kappingarár verður stórt trýst á Filip Jicha.
Páskadag klokkan 17 spælir Kiel dyst í bundesliguni móti Lemgo á útivølli.
