Illveðrið, sum herjaði Danmark í gjárkvøldið og í nátt, gjørdi serliga um seg í Norðurjyllandi. Í Hanstholm kom vindferðin upp í 39 metrar um sekundið, og løgreglan sigur, at hetta var tað ringasta illveðrið í norðara parti av Jyllandi síðani 2005.
Tann nógvi vindurin gjørdi eisini skaða. Í Skagen fór tað umleið 200 fermetrar stóra takið oman av fiskavirkinum hjá Læsø Fiskeindustri. Fleiri bygningar og sethús fingu skaða aðrastaðni, og trø brotnaðu í tí nógva vindinum. Illveðrið hevði eisini nógv regn við sær, og tað elvdi til vatnflóð summastaðni.
Falck hevði 157 uppgávur í gjárkvøldið og í nátt. 105 teirra vóru í Norðurjyllandi.
