Sponsoravtalan er fyri tvey ár og hevur við sær, at Reyni Service verður sjónligt á búnunum hjá Kyndli hetta kappingarárið og kappingarárið 2013/2014.
– Vit fegnast um at kunna stuðla einum so søguríkum og sigursvandum felag sum Kyndli, ið hevur nógvar limir í bæði vaksnamannadeild og ungdómsdeild, sigur Sámal av Reyni, stjóri í Reyni Service.
Kyndil fegnast almikið um stuðulsavtaluna, sum kemur væl við, tí virksemið í felagnum er sjálvboðið arbeiði, ið fíggjarliga hvílir á sponsorat frá vinnulívinum, limagjald og stuðulstiltøk.
Málsetningurin hjá Kyndli í bestu deildunum er at røkka finalum í ár. Kvinnuliðið liggur væl fyri at koma í FM-finalurnar, og eisini menninir kunnu røkka finalunum.
Ungdómsliðini hjá Kyndli eru nærum øll við í kappingini um at vinna FM-heitið, og mong teirra hava eisini møguleika at koma í finalurnar í steypakappingini.
Kyndil leggur stóran dent á at hava góðar venjarar. Flest allir hava drúgvar royndir sum spælarar, og hetta sæst aftur á spælinum hjá ymsu liðunum, ið ofta er gott og flýtur væl.
