Bob Barr umboðaði republikanska flokkin í Kongressini til fyri tveimum árum síðani, tá hann valdi at fara upp í tann lítla libertarianska flokkin. Har hevur hann veruliga gjørt um seg og hevur vunnið sær støðugt størri ávirkan og undirtøku. Nakrar fáar dagar undan floksfundinum í mai kunngjørdi hann, at hann ætlaði sær at stilla upp sum forsetavalevni hjá flokkinum, og aftan á seks atkvøðugreiðslur varð hann góðkendur sum forsetavalevni.
Samanborin við teir báðar stóru flokkarnar í USA, demokratarnar og republikanararnar, er libertarianski flokkurin lítil og kanska meiri ein rørsla enn ein flokkur. Tí hevur Bob Barr ongan livandi møguleika á forsetavalinum í heyst.
Men hann kann fáa so mikið av atkvøðum, at tað kann ávirka úrslitið av kappingini millum Barrack Obama og John McCain í teimum statunum, har munurin millum teir báðar er litil. Taparin í hesum føri verður John Mccain.
Kann gera mun
Higartil hevur tað eydnast Bob Barr at fáa sítt navn á atkvøðuseðlarnar í 30 statum, og fyribils er tað serliga staturin Georgia, sum hevur áhuga. Bob Barr býr í Georgia, og tað kann geva honum lutfalsliga nógvar atkvøður har. Tað er tí ikki av tilvild, at barrack Obama er farin undir eitt átak ímóti republikanarunum í Georgia.
David Plouffe, sum stendur á odda fyri valstríðnum hjá Barrack Obama, sigur við Los Angeles Times, at fær Bob Barr kann saktans fáa fýra prosent av atkvøðunum í Georgia og tvey prosent í teimum flestu av hinum statunum. Hetta samsvarar eisini rættiliga væl við eina meiningakanning hjá sama blaði. Hon vísti, at Bob Barr kann fáa trý prosent á forsetavalinum, og at nógv teir flestu av hansara veljarum komu frá republikanska flokkinum.
Heldur hetta, kann republikanarin Bob Barr geva amerikanarunum ein demokrat í Hvítu Húsini á valinum í heyst.
