Í kappingini, sum Víkingur herfyri skipaði fyri millum fýra tey fremstu liðini frá kappingini í fjør, vendi alt meira ella minni øvugt, tí Skála vann í finaluni á Víkingi, og AB vann í bronsudystinum á KÍ. Sama dag var dystur millum uppflytararnar, B36 og HB, og hann vunnu HB-kvinnurnar. Hertil skal tó sigast, at fleiri av liðunum vóru skerd, so tað gav ikki rættastu myndina kortini.
Kappingin hjá kvinnunum hevur í meira enn tíggju ár snúð seg um, um nú nakar megnaði at bjóða KÍ ordiliga av, tí klaksvíkskvinnur hava nú vunnið ellivu meistaraheiti á rað – og siga seg framvegis vera svangar eftir meira. Hetta er eisini spurningurin í ár, um nakar klárar at standa KÍ kurl, tá avtornar, ella um alt verður, sum tað plagar, tá kappingin er av í heyst.
Fyrsti dysturin hjá KÍ er á útivølli ímóti B36, sum er uppflytari. B36 hevur fyrr megnað at givið KÍ kapping til strikuna, og tað eina árið var bara málúrtøkan á muni, men neyvan hava havnarkvinnur somu styrki, sum tær tá høvdu.
Víkingur tekur ímóti AB í Gøtu og er hetta ein uppgerð millum nummar fýra og tvey í fjør, sum eisini kann geva eina ábending um, hvat liðini makta. Í triðja dystinum spæla uppfluttu kvinnurnar hjá HB á heimavølli ímóti Skála, sum í fjør vann bronsu og kom í steypafinaluna.
