Hin 3. juli 2009 vóru strangari leiðreglur settar fyri, nær fylgjari kann ávísast at fara við sjúklinginum settar í verk. Hetta hevur eisini fingið talið av avvarðandi munandi niður.
Í leiðreglunum fyri, nær fylgjarar kunnu ávísast við sjúklingum uttanlands, stendur, í § 7, stk 2 at: “Gera heilt serlig viðurskifti seg galdandi, kann sjúkrahúsverkið bera ferðaútreiðslurnar, so ein persónur kann verða ávístur at fara við sjúklinginum sum fylgjari. Yvirlæknin tekur avgerð um møguligan fylgjara”.
Í sambandi við ”heilt serlig viðurskifti” er høvuðsreglan, at yvirlækni kann ávísa fylgjara við sjúklinginum, har heilt serlig viðurskifti gera seg galdandi, tá talan er um sjúklingar við lívshóttandi sjúku, ið bráðfeingis verða ávístur til viðgerð uttanlands.
Yvirlækni kann harumframt í ávísan mun ávísa fylgjara til sjúklingar, sum vegna høgan aldur, sálarliga sjúku ella ringt avlamni als ongan møguleika hava at ferðast og uppihalda seg einsamallar uttanlands, og har tað ikki er møguligt at stíla fyri praktiskari hjálp til hesar
sjúklingar á staðnum.
Her verður eisini tilskilað, at viðurskifti hjá sjúklingum, ið IKKI eru at rokna sum “heilt serlig viðurskifti” eitt nú fevna um:
Afturvendandi kontrolvitjanir, har ikki kann roknast við, at sjúklingurin fær ring/verri boð viðvíkjandi útlitum fyri lívi ella førleika.
Krabbameinssjúklingar, sum ferðast til kontrollvitjanir.
Krabbameinssjúklingar, ið ferðast til cytostatikaviðgerð (kemoviðgerð), sum ikki kann gevast í Føroyum, og har hjáárin ikki væntast fyrrenn eftir heimkomuna til Føroyar.
Eisini verður greitt frá, at støður sum: Ótti fyri at flúgva, trupulleikar við at finna í Keypmannahavn ella øðrum býum uttanlands, trupult at bera nógv viðføri og líknandi eru heldur ikki at rokna sum heilt serlig viðurskifti. Í hesum føri ber til dømis til at stíla fyri praktiskari hjálp á staðnum.
Sostatt skal rættiliga nógv til, fyrr enn krabbameinssjúklingur eigur at fáa ávístan fylgjara við sær.
