BILAR
Sjáldan hevur verið gjørt so nógv hóvasták burtur úr einum so lítlum bili, sum VW Lupo bilinum hjá Erlingi Simonsen. Hetta er tó ikki uttan orsøk. Fyrr sungu skúlabørnini »busta tenn, busta tenn, tað sigur Erling Simonsen«. Eitt slagorð hjá tannlæknum er eisini, at »reinar tenn brenna ikki«. Nú kunnu vit eisini siga, at »reinur motorur dálkar ikki«, tað sigur Erling Simonsen.
Hetta er tað, sum er so áhugavert við hesum Lupo bilinum, hann er sera umhvørvisvinarligur. Nú er tað ein fyrimunur hjá Erling Simonsen, at hann hevur havt bilin í hálvtannað ár, áðrenn hann bleiv gjørdur um til rapsbil. Tí merkir hann beinanvegin, um bilurin er broyttur, um hann kraftar tað sama o.s.v.
Erling Simonsen sigur, at so at siga eingin munur er á bilinum, hann trekkjur tað sama, og bilurin er líka kvikur, sum hann var áðrenn umbyggingina.
Tá tangin er tómur, kann hann ikki fáa rapsolju á servicestøðunum í býnum, tí hevur hann ein tunnu við 200 litrum av rapsolju heima. So eina tíð framyvir verður hann sín egni »tankpassari«.
