Tann nú fyrrverandi altjóða dómari føroyinga, Petur Reinert, hevur verið ivasamur um hann fekk hildið fram við at døma vegna ein skaða í hælinum, sum hann hevur drigist við í fleiri ár.
Í fyrsta lagi legði Petur Reinert starvið sum FIFA-dómari frá sær í fjør. Hetta starvið fall heldur Kára J. á Høvdanum í lut, og Petur Reinert hevur verið ivasamur um hann yvirhøvur fór at halda fram við at døma her heima.
Les eisini: Dømdi altjóða dystir í 28 londum
Avgerðin er nú tikin, og Petur Reinert heldur fram við at døma føroyskan fótbólt í øllum førum í eitt ár afturat. Hetta váttar hann fyri in.fo í dag.
Petur er longu settur á uppgávur fyrsta umfar av landskappingunum nú um vikuskiftið. Leygardagin dømir hann 1. deildardystin ímillum NSÍ og KÍ, og sunnudagin verður hann 4. dómari í Betri-dystinum ímillum EB/Streym og B36.
Petur Reinert, sum júst er blivin 40 ár, hevur dømt 578 dystir, umframt at hann í øðrum meira enn 200 dystum hevur verið hjálpardómari, 4. dómari og eygleiðari.
