Sjálvt uttan menn sum Cristiano Ronaldo, Samir Kedira og Mesut Ozil frá byrjan, megnaði Real Madrid at vinna á Barcelona. Úrslitið gjørdist 2-1.
Real Madrid hevur lítlan møguleika at vinna La Liga, og tí valdi José Mourinho, venjari hjá Real Madrid, at spara fleiri av spælarunum til Champions League dystin móti Manchester United týskvøldið.
Barcelona var nærmast í sterkastu uppstilling, men tað tað sást ikki aftur á vøllinum. Real Madrid kom á odda tíðliga í dystinum, tá Morata sendi bóltin innfyri til Karin Benzema, sum tætt undir málinum skoraði.
Lionel Messi javnaði fyri Barcelona, tá Dani Alves spældi hann leysan. Lionel Messi er annars ikki til at kenna aftur fyri tíðina. Hann var lítið sjónligur og gjørdi ikki nógv um seg.
Í seinna hálvleiki komu bæði Cristiano Ronaldo og Samir Kedira inn fyri Real Madrid. Seint í seinna hálvleiki avgjørdi Sergio Ramos dystin, tá hann stútaði eitt hornaspark í mál.
Í seinna hálvleiki fór dómarin at spæla kort og tóktist missa tamarhaldið á dystinum. Onkur vildi kanska eisini sagt, at fleiri spælarar mistu tamarhaldið á sær sjálvum. Barcelona áttu brotsspark í evstu løtu, tá Adriano varð feldur, men dómarin bríkslaði ikki.
Fleiri Barcelona spælarar blívu í øðini og fingu gult kort. Bara sekundir seinni bríkslaði dómarin fyri seinastu ferð og tá fekk Victor Valdes, málverji hjá Barcelona, sítt seinna gula kort fyri at brokka seg.
Cristiano Ronaldo var annars líka við at økja til 3-1 beint áðrenn, tá hann sendi eitt fríspark á sjálvan trýkantin.
Real Madrid vann við einum partvís eykaliðið og tykist hava fingið tamarhald á innanhýsis uppgerðinum móti Barcelona. Tó so, so er Barcelona heili 13 stig frammanfyri Real Madrid í landskappingini.
