Ein singlepláta frá 1962 við The Beatles verður í næstum sett til sølu. plátan hevur ligið burturgoymd á einum lofti í 50 ár og er sjáldsom og av savnarum mett at hava stórt virði.
Løgini á plátuni eru "Till There Was You" og "Hello Little Girl". Eigarin er Les Maguire, ið leikti ljómborð í Gerry and the Pacemakers, ein bólkur, ið var á toppinum samstundis sum The Beatles.
Beatles managarin Brian Epstein hevur skrivað á húsan, og væntast kann, at hetta økir um virðið á plátuni. Mett verður, at plátan á uppboðsølu ikki fer fyri minni enn 100.000 danskar krónur.
