Týsdagin 18. oktober andaðist Randi Joensen, Tórfinsgøta 30, Tórshavn.
Randi er fødd við Norðskála 5. mars í 1932. Tá hon er trý ára gomul fluttu tey í nýggju húsini á Oyrarbakka. Foreldur hennara vóru Lena og Jógvan Joensen. Lena, fødd Nysted, var frá Norðskála, og Jógvan úr Leynum, nevndur.
Randi vaks upp í fiskimannaheimi, og har var fjálgt og gott heima í einbýlinum á Oyrarbakka. Tey vóru fimm systkin, Randi, Daniella, Jákup, Rólant og Súsanna.
Við Randi er ein sjáldsama virkin og nærløgd kvinna horvin úr myndini. Hon var alla sína tíð virkin og fegin um lívið, og hon vildi stuðla og menna tað hon orkaði.
Ung fer hon á háskúla og síðani fer hon til verka: Fyrst arbeiðsgenta í húsinum hjá Jóannes av Skarði, háskúlastjóra. Hon er arbeiðsgenta hjá Miu Trónd, tannlækna, í fýra ár. Á Sjómansheiminum er hon í tveimum skiftum.
Hon fer niður í 1954 at læra til sjúkrasystur, men Koreakríggið hevði við sær, at hon fer heimaftur, áðrenn læran var av.
Randi og Leivur giftust 16. september í 1958. Tey búgva á Oyrarbakka til tey flyta í nýbygdu húsini í Tórfinsgøtu í Havn. Eldru døtrarnar, Jónleyg og Andrea eru føddar á Oyrarbakka í 1959 og í 1963, meðan yngsta dóttirin, Lena, er fødd í Havn í 1968.
Randi arbeiddi sum hjálparfólk í Frítíðarheiminum í Skrivaragøtu í 25 ár. Hennara nærlagni var stórt, hon var altíð tøk, tá ið heitt varð á hana.
Randi var á ungum árum ófør í Havnar Róðrarfelag. Hon var limur í Losjuni í Havn, og hevur øll árini tikið lut í felagsarbeiðinum. Hesi seinni árini við tiltøkum fyri tilkomin og eldri, sum Losjan hevur stílað fyri síðani áttatiárini.
Í heiminum í Tórfinsgøtu kom altíð nógv fólk. Ættarkær var hon, ongan gloymdi hon. Nú hon er horvin úr myndini, eru vit mong, ið sakna Randi. Men eftir eiga vit minni um eina menniskju, ið gav nógv í lívi sínum. Randi var livandi og góðgerin, har hon ferðaðist. Ikki minst fyri ommubørnini, sum eru átta í tali.
Saknurin verður stórur hjá Leivi, hjá døtrunum og ommubørnum, og tómleikin somuleiðis.
------
jl
