Marlon Polk, dómari, hevði ikki ilt við at finna eina grundgeving fyri at vísa stevningini ímóti Guði aftur. Í lógini stendur, at rætturin skal senda tí stevnda øll skjøl við postinum, og tá Guð ikki hevur nakra postsdressu, kundi málið ikki takast upp.
- Út frá hesum er rætturin komin til ta niðurstøðu, at tað ber ikki til at kunna tann stevna um stevningina, og tí verður málið víst burtur, segði Marlon Polk, dómari.
Maðurin, sum vildi sleppa at stevna Guði, eitur Ernie Chambers og er fyrrverandi senatorur í statinum Nebraska. Hann vildi hava dómsvaldið at steðga tí deyða, oyðing og ágangi, sum Guð hevur verið atvoldin til, og sum fleiri milliónir fólk hava liðið undir.
Tann 71 ára gamnli Chambers sigur sambært BBC, at hann fer at lesa niðurstøðuna hjá rættinum gjølla, áðrenn hann tekur støðu til, um hann skal leggja málið fyri ein hægri rætt. Annars undrast hann eitt sindur á grundgevingina hjá Marlon Polk, dómara.
- Er tað so, at Guð veit alt, so veit hann eisini, at hann er stevndur, sigur Chambers.
