- Fleiri teirra hava leingi ligið inni við góðum hugskotum. Spurningur teirra hevur verið, hvar tey skuldu venda sær fyri at fáa góða ráð víðari.
- Íverksetarahúsið í Klaksvík er rætta staðið fyri hesi fólkini. Tey verða ikki víst á dyr, men vit kunnu tvørturímóti hjálpa teimum at lata dyr upp, soleiðis at tey av álvara sleppa til verka, sigur Rani Nolsøe.
Í umhvørvinum í Íverksetarahúsinum fáa nøkur týðandi amboð og góð ráð, samstundis sum ein kemur at vera saman við øðrum fólkum við sama áhuga.
Trý netverk eru virkin í Íverksetarhúsinum, sum nú er sett alment á stovn.
Eftir at hugskotið um íverksetan og eitt íverksetarahús í Klaksvík kom, hevur nógv orðaskifti verið millum vinnulívsfólk, Menningardeildina hjá kommununi og Vinnulívsráðið í Klaksvík.
Hetta er nú endað við, at Klaksvíkar kommuna setur hetta íverksetarahúsið á stovn. Virksemið byrjaði við eini verkætlan í samstarvi við Birc Estate í Herning, og verkætlanin fór av bakkastokki 15. januar á einum íverksetarakvøldi í mentanarhúsinum Atlantis.
Síðani tá hava tvey fullteknað skeið í íverksetan verið hildin. Um somu tíð hava slakir 30 íverksetarar leitað sær ráðgeving her.
Trý íverksetaranetverk eru í løtuni virkin í húsinum. Fleiri verkætlanir fara væntandi í gongd í næstum, og so skjótt sum hølini verða tøk, fara íverksetarar at kunna leiga høli her.
