Rókur og liðfelagarnir taptu greitt á útivølli

Seinnapartin hevði føroyski landsliðsveteranurin, Rókur Akralíð saman við liðfeløgunum í HEI Skæring møguleikan at vinna seg upp á níggjunda plássi í næstbestu donsku hondbóltsdeildini.

Liðini sum enda sum nummar 14, 13 og 12 flyta beinleiðis niður, og liðini sum enda nummar 11 og 10 í grundspælinum mugu spæla upp- og niðurflytingardystir móti liðum úr triðbestu hondbóltsdeildini.

Tá HEI Skæring fór á vøllin í Otterup var heimaliðið á níggjunda plássi bert eitt stig frammanfyri HEI Skæring á stigatalvuni.

Nú er Otterup trý stig frammanfyri HEI Skæring, tí teir vunnu greiðan 39-28 sigur á Róki Akralíð og liðfeløgunum. Í steðginum var Otterup á odda 19-15.

Rókur gjørdist næstbesti málskjúttin hjá HEI Skæring við fýra málum. 

Nú eru bert tríggir dystir eftir í grundspælinum, og skírisdag tekur HEI Skæring móti Skive, ið liggur næstfremst í deildini við 40 stigum, so tað sær ikki so øðiliga bjart út hjá Róki og liðfeløgunum at røkka níggjunda plássinum nú.