Seinasta fríggjadag avdúkaðu menn hjá norska fiskiveiðieftirlitinum, at ein spanskur trolari hevði nógvan svartklava í lastini, sjálvt um hann segði seg fiska rækjur. Í gjár kom trolarin til Tromsø saman við einum sjóverjuskipi, og mett varð, at trolarin hevði umleið 80 tons av svartkalva í frystilastini.
Men hetta var ikki tann einasti spanski trolarin, sum hevði fiskað annað enn tað, sum hann segði seg fiska. Sunnudagin fóru norskir eftirlitsmenn umborð á trolaran Garoya Segundo . Alment var hann komin á Svalbardleiðina at fiska rækjur, men tað vísti seg, at hann hevði meiri enn 100 tons av svartkalva í lastini, men í dagbókini hjá skipinum stóð ikki eitt orð um, at teir høvdu fingið nakran svartkalva.
John Espen Lien hjá norska fiskiveiðieftirlitinum sigur við Aftenposten, at lastin hjá Garoya Segundo er millum tvær og tríggjar milliónir krónur verd, men hann dugir ikki at siga, at samband er ímillum teir báðar sponsku trolararnar, sum eru tiknir.
-Tað er ikki loyvt at fiska svartkalva við Svalbard, og tilburðirnir við teimum báðum sponsku trolarunum vísa, hvussu umráðandi tað er at hava neyvt eftirlit við fiskiskapinum her, sigur John Espen Lien.
