Fiskiloyvi
Tá línuskipið Ågot varð seld norðmonnum, tí klaksvíkingar fingu annað skip ístaðin, varð sett í loyvið frá Fiskimálastýrinum um flyting av fiskirættindunum dagf. 15 august 2001, at Ågot ongantíð aftur máti reka vinnuliga fiskiskap undir føroyskum flaggi. Kortini hevur skipið nú fingið loyvi til júst hetta.
Stjórin á Fiskivinnustovuni vísir til ein dóm, sum sigur, at ræðisavmarkingin uttan víðari kann flytast.
?Humbukk, sigur formaðurin í Vinnunevnd Løgtingsins, og formaðurin í Felagnum Línuskiop sigur tað vera at halda fólk fyri tað turra spott.
Tann 15. august 2001 hava Jørgen Niclasen, landsstýrismaður við fiskivinnumálum og ein embætismaður í Fiskimálastýrinum skrivað undir loyvi til at flyta fiskirættindini hjá Ågot til norska línuskipið Urvaag, sum keypt var at koma í flotan fyri Ågot, ið tikin varð úr flotanum og seld norðmonnunum, sum áttu Urvaag.
Í hesum loyvi frá Fiskimálastýrinum stendur tann treyt, at :
»Tilsøgnin um flyting av fiskirættindunum er eisini treytað av, at eigarin av m/s "Ågot" við ræðisavmarking váttar, at skipið ikki verður sett inn í vinnuligan fiskiskap aftur undir føroyskum flaggi. Somuleiðis skal vera tilskilað, at skipið ikki má seljast uttan so, at keyparin góðtekur hesa avmarking í nýtsluni av skipinum«.
Hesa ræðisavmarking hava so bæði seljarin og keyparin váttað á einum ískoytisskjali, sum liggur við loyvinum um flyting av fiskirættindunum hjá Ågot.
Kortini hendir so hvørki verri ella betri enn tað, at Ågot, sum nú eitur Ågot 1, verður keypt av føroyskum felag og fær fiskiloyvi undir føroyskum flaggi frá sama Fiskimálastýri, sum tó nú eitur Fiskimálaráðið. Hóast hesa áðurnevndu ræðisavmarking.
?Tað er einki, sum hindrar tí, sigur stjórin á Fiskivinnustovuni í Fiskimálaráðnum. Tað er beinleiðsi álagt okkum í dómi, sigur hann.
Talan er um borgarligan dóm nr. 817/1999, har sagt verður, at ræðisavmarkingin kann strikast, um annað ella onnur før samstundis verða ræðisavmarkað.
Formaðurin í Vinnunevnd løgtingsins, Henrik Old, og formaðurin í Felagnum Línuskip, Rólant Poulsen, eru milt sagt ikki nøgdir við hesa tulkingina.
Henrik Old, formaður í Vinnunevndini, heldur tað vera tað reina humbukk alt tað heila.
Hann undrast á, hvat hatta skal standa í lógum og kunngeðrum til, tá tað einki virði hevur kortini. Og so seint sum seinasta fríggjadag er kunngerð lýst við júst hesum sama orðalagi um ræðisavmarkingar. Tað er ov vánaligt av Fiskimálastýrinum, heldur hann, at tey har vita um hendan dómin og kortini blíva við at seta slíkt í kunngerðirnar.
Formaðurin í Felagnum Línuskip sigur tað vera at halda fólk fyri tað turra spott at kunngerða slíkt, tá ein veit frammanundan, at tað kann broytast sum best ber til kortini.
?Her skriva mennundir eitt skjal í góðari trúgv og gera, sum lógin ásetir. Teir lata eitt stórt skip frá sær, tí soleiðis er álagt teimum. Men sama skip fáa aðrir so aftur fyri tveir smáar útróðrarbátar. Hesir fyrru menninnir kundu gott gjørt akkurát tað sama. Nú eru teir rukkur ístaðin, heldur hann.
