Súni Olsen, venjari hjá besta kvinnuliðnum hjá B36, hevur givið ilt av sær, tí Fótbóltssambandið hevur avlýst allan fótbólt, uttan Betri deildina hjá monnum. Hann spurdi í almennum brævi til Fótbóltssambandið um menn eru immunir fyri koronu.
Les eisin: Súni Olsen spyr um menn eru immunir fyri koronu
Róin Schrøter, formaður í Kappingarnevndini hjá Fótbóltssambandinum, sigur nú at orsøkin er, at tað eru so nógvir ungir spælarar í øllum hinum kappingunum. Hann vísur millum annað á, at fleiri lið í kvinnudeildini hava spælarar í sóttarhaldi.
- Sum vit skilja tað, so ganga nógvir spælarar í bestu kvinnudeildini á Glasi og sita tí í sóttarhaldi. Um kvinnuliðini vilja spæla uttan teir spælararnar, so ber tað nokk til, sigur Róin Schrøter, og vísur at tað er sama tilfeldið í næstbestu deildini hjá monnum.
Hann leggur afturat, at tað eru ikki so nógvir spælarar í Betri deildini hjá monnum, sum sita í sóttarhaldi. Harðast rakt er AB, har seks spælarar sita í sóttarhaldi, og har bleiv dysturin móti Víkingi útsettur.
Formaðurin í Kappingarnevndini sigur eisini við kringvarpið, at tað er lættari at flyta dystir í kvinnudeildini, enn í mansdeildini, har landskappingini er nógv drúgvari.
